Sacipta ning waruga nu kumelenjang di alam dunya
Salahir batin anu buncelik jag-jag belejag taya duana
Ngorejat urat nu ranteng teu manggih ka keueung
Harita kuring can gering..
Kekerot nalika datang semah nu nganjang
Nu ngadon ngababar sihung ngeundeuk-ngeundeuk lalampahan
Saharita kuring tandang
Gede wawanen teu malire hahalang
Harita kuring can gering..
Leuweung nu peteng pinuh ku balukar juriwetna akar kiara
Can ka ambah ledigna tapak jelema
Taya hariwang taya kamelang
Sakumna mahluk nu marakayang
Harita kuring can gering..
Kacaturkeun lalakon pungkas mangsana
Wayah datang cocobi gusti anu nyipta ati
Kuring sadar sakumna sukma nu nyanding dina jiwa
Nu ngajisim dina sajeroning jirim
Saharita kuring ngadadak eling..
Ayeuna geus manggih wayah
Nalika walungan caah
Seah nu mawa kamelang ngaleungitkeun wawanen
Diri anu pinuh kasakti
Ngadadak rumasa teu daya
Ku kanyeri pangangken Gusti
Harita kuring keur gering
Mugia salawasna eling......
Tidak ada komentar:
Posting Komentar